Plantun de Prouvènço

Pèr coumpara dos planto d'encò nostre

Trisetum distichophyllum & Vinca major

Trisetum distichophyllum

Poaceae Graminaceae

Noms en français : Avoine distique, Trisète à feuilles distiques.

Descripcioun :
Aquéu civadoun trachis au mitan dis esboudèu d'auto mountagno ounte ié fai de coulounìo bonodi soun rizoumo. Lis enflourejado soun courteto e proun laco à la flourido. Caupon d'espigueto de 2 à 4 flour jaunasso. Se recounèis peréu à si fueio di ramo esterlo en pousicioun distico. Coumpara emé lou margaioun-di-fueio-distico que trachis dins li mémi relarg e fai de ramo tambèn distico.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 6 à 30 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Trisetum
Famiho : Poaceae
Famiho classico : Graminaceae

Ordre : Poales

Coulour de la flour : Jauno
Petalo : ges
Ø (o loungour) enflourejado : 3 à 6 cm
Flourido : Estiéu

Sòu : Ca
Autour basso e auto : 1700 à 3000 m
Aparado : Noun
Juilet à avoust

Liò : Esboudèu - Roucaio - Tepiero de bancau
Estànci : Subaupen à Aupen
Couroulougi : Ouroufilo-Sud-Éuropo
Ref. sc. : Trisetum distichophyllum (Vill.) P.Beauv. ex Roem. & Schult., 1817

Pervènco

Vinca major

Apocynaceae

Àutri noum : Pervinco, Prouvençalo, Piéucelage.

Nom en français : Grande pervenche.

Descripcioun :
Pervènco di gràndi flour bluio, emé de fueio largo de mai de 3 cm, un pau en formo de cor. Li sepalo soun longo e cihado. S'atrobo en ribo d'aigo (ripilsivo) mai peréu dins li baragno e tóuti li relarg un pau fres. Souvènt cultivado, se pòu naturalisa proche dis oustau.

Usanço :
Emai siegue vertuouso, touto la planto es empouisounanto, e pèr acò la fau emplega emé forço avisamen. Di fueio èi tirado de la vincamino qu'èi bono pèr la circulacioun dóu sang e l'óussigenacioun di tarnavello en raport emé lou destrachimen ; s'emplego peréu pèr sougna li léucemìo. La pervènco èi pourtado coume ensigne pèr li mantenèire dóu Felibrige (vèire çai-contro).